KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Projekti

“Rritja e ndërgjegjësimit për zbatimin e Statutit të Gjykatës Ndërkombëtare Penale në Shqipëri”

20.02.2004

Në kuadër të bashkëpunimit me Institutin e Lëvizjes Federaliste Botërore për Politikat Globale dhe Koalicionin e OJF-ve për Gjykatën Ndërkombëtare Penale, Komiteti Shqiptar i Helsinkit duke filluar nga muaji shkurt do të zbatojë projektin “Rritja e ndërgjegjësimit për zbatimin e Statutit të Gjykatës Ndërkombëtare Penale në Shqipëri”. Shqipëria ka ratifikuar dhe nënshkruar më 25 Dhjetor të 2002 Traktatin e Romës. Për shkak të kompleksitetit dhe në të njëjtën kohë të risisë që solli Statuti i Gjykatës Ndërkombëtare Penale, aderimi i Republikës së Shqipërisë në këtë traktat, do të vijë përmes rezultateve politike, ligjore dhe financiare.

KSHH-ja ka marrë inisiativën për përgatitjen e një botimi për informimin më të mirë të publikut dhe sistemit gjygjësor për rolin e Gjykatës Ndërkombëtare Penale dhe për zbatimin e Statutit të saj në legjislacionin e brendshëm.

Nëpërmjet këtij projekti synohet të arrihen objektivat e mëposhtëm:

• Rritja e ndërgjegjësimit të publikut për kuptimin më të mirë të rolit të Gjykatës Ndërkombëtare Penale dhe për zbatimin e Statutit të saj në sistemin e brendshëm gjygjësor shqiptar.

• Inkurajimi i shoqërisë civile shqiptare për të patur një informacion më të mirë rreth Gjykatës Ndërkombëtare Penale dhe nxitja e strukturave përgjegjëse shtetërore për të ndërmarrë hapat dhe masat e nevojshme për një zbatim të plotë të Statutit të Romës në realitetin shqiptar.

Nga zbatimi i projektit do të përfitojnë:

• Të gjithë personat që janë në juridiksionin e Republikës së Shqipërisë, sepse juridiksioni i Gjykatës Ndërkombëtare Penale do të shtrihet edhe mbi ta.

• Punonjësit e sistemit gjygjësor shqiptar, veçanërisht gjyqtarët, prokurorët dhe avokatët të cilëve u duhet të familjarizohen me Gjykatën Ndërkombëtare Penale.

• Studentët e Fakultetit të Drejtësisë dhe të gjithë praktikuesit e ligjit që e kanë zgjedhur të ardhmen e tyre profesionale në fushën ndërkombëtare penale.

• Shoqëria civile shqiptare dhe në mënyrë të veçantë organizatat e të drejtave të njeriut.

• Përfaqësuesit e strukturave shtetërore, që janë të ngarkuar me ligj për të bërë përmirësimet ligjore.

Zbatimi i këtij projekti do të jetë hapi i parë për identifikimin e stakeholderave dhe një kontribut kritik për një harmonizim përfundimtar dhe zhvillim të legjislacionit vendas në të ardhmen.

Rezultatet që priten nga zbatimi i këtij projekti:

• Një informim më i mirë për arritjet dhe mangësitë e legjislacionit shqiptar, hapat e mëtejshëm e të nevojshëm për zbatimin e plotë të Statutit të Gjykatës Ndërkombëtare Penale në legjislacionin vendas.

• Një sensibilizim më i mirë i publikut në përgjithësi dhe i profesionistëve në veçanti.

• Përmirësimi i kontekstit ligjor në lidhje me Gjykatën Ndërkombëtare Penale dhe legjislacionin ndërkombëtar penal.

• Forcimi i rolit të shoqërisë civile shqiptare në procesin e zbatimit të plotë të Statutit të Gjykatës Ndërkombëtare Penale në legjislacionin shqiptar dhe në bashkëpunimin me Kualicionin për Gjykatën Ndërkombëtare Penale.

 Komitetit Shqiptar i Helsinkit në kuadër të këtij projekti do të organizojë aktivitete të ndryshme, si një tavolinë të rrumbullakët me ekspertë, mbledhje me përfaqësues të OJF-ve të tjera në fushën e të drejtave të njeriut dhe do të përgatisë një publikim informues. Projekti do të realizohet nga 1 shkurti deri më 30 qershor 2004. Ky projekt financohet nga Instituti i Lëvizjes Federaliste Botërore për Politikat Globale dhe Koalicioni i OJF-ve për Gjykatën Ndërkombëtare Penale.