KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Komiteti Shqiptar i Helsinkit kur reagon mbështetet vetëm në dokumentat ndërkombëtare, në Kushtetutën dhe ligjet tona

07.06.2004 

Në përgjigje të shkrimit pa autor, botuar në gazetën “55” të datës 7 Qershor 2004 me titull “Komiteti i Helsinkit strehon vjedhjet e Nanos”, e shikojmë të nevojshme të sqarojmë sa më poshtë:

Qysh në fund të muajit Prill të këtij viti, d.m.th. para se Inspektoriati i Përgjithshëm për Kontrollin e deklarimit të pasurive të bënte publike të dhënat për pasuritë e disa prej subjekteve të parashikuara në ligj, KSHH mbështetur në nenin 134 pika 2 e Kushtetutës i është drejtuar Gjykatës Kushtetuese me kërkesën objekt shfuqizimin si të papajtueshëm me Kushtetutën e Republikës së Shqipërisë, të nenit 34 të Ligjit Nr. 9049, datë 10.04.2003 “Për deklarimin dhe kontrollin e pasurive të detyrimeve financiare të të zgjedhurve dhe të disa nëpunësve publikë”.

Në nenin 34 të këtij ligji thuhet se: “Të dhënat që përfitohen nga deklarimi sipas këtij ligji, janë të lejueshme për publikim, në përputhje me ligjin Nr. 8503, datë 30.06.1999 “Për të drejtën e informimit për dokumentat zyrtarë”.

KSHH mendon se ligjvënësi duhej t’i referohej jo ligjit “Për të drejtën e informimit për dokumentat zyrtarë”, por ligjit Nr. 8547, datë 11.02.1999 “Për mbrojtjen e të dhënave personale”. Në nenin 10 të këtij ligji, thuhet se “Trajtimi i të dhënave personale nga persona të tjerë, lejohet vetëm në rast se subjekti i ketyre të dhënave ka dhënë shprehimisht pëlqimin për këtë trajtim”.

Meqënëse KSHH, të dhënat mbi deklarimin e pasurisë të subjekteve të ndryshme i konsideron të dhëna personale, (edhe pse të domosdoshme për deklarim) publikimin e tyre pa pëlqimin e subjekteve përkatës e quan cënim të së drejtës së privatësisë sanksionuar në nenin 35 të Kushtetutës dhe nenin 8 të Konventës Evropiane të të Drejtave të Njeriut.

Vlen të thkesohet se për KSHH-në, kur cënohen të drejtat dhe liritë e shtetasve, nuk ka rëndësi fakti nëse kemi të bëjmë me të ndaluar, të paraburgosur apo të dënuar, pensionistë, të punësuar ose jo, nëpunës të thjeshtë apo zyrtarë, funksionarë shteti apo të zgjedhur, me ose pa imunitet, etj. KSHH mbështet fuqimisht luftën kundër korrupsionit si dhe ligjin Nr. 9049, datë 10.04. 2003 që i shërben intensifikimit të kësaj lufte. KSHH është për denoncimin në organet e ndjekjes së çdo personi, pavarësisht nga funksioni që ka, në qoftë se gjatë verifikimit të të dhënave të pasurive që ai deklaron, ka të dhëna për kryerjen e ndonjë vepre penale. Por në të njëjtën kohë, është e drejtë e tij të reagojë kur konstaton cënim të të drejtave të shtetasve.

KSHH është një organizatë jo-fitimprurëse që ka organet e tij (mbledhjen e përgjithshme, bordin dhe stafin e vet). Në deklaratat dhe qëndrimet e tij, ai mbështetet vetëm në dokumentat ndërkombëtarë, Kushtetutën dhe ligjet tona. Në këtë drejtim, KSHH nuk i merr leje askujt dhe nuk tërhiqet nga presionet dhe synimet demigruese të çfarëdo natyre që të jenë ato. Në këto 14 vjet të ekzistencës së tij, KSHH për shkak të pozicionimit të tij të pavarur dhe objektiv, e ka rritur reputacionin e tij brenda dhe jashtë vendit.

Autorit të shkrimit të gazetës “55”, do t’i sugjeronim që t’i hidhte një sy raporteve vjetore të Departamentit të SHBA lidhur me respektimin e të drejtave të njeriut në Shqipëri dhe do të bindej se KSHH citohet si një burim i pavarur informacioni.

KSHH i është drejtuar gjykatës Kushtetuese, si organi i vetëm kompetent për të shqyrtuar pajtueshmërinë e ligjit me Kushtetutën.

Ne nuk paragjykojmë vendimin e kësaj Gjykate dhe do të respektojmë atë, edhe sikur kërkesa e KSHH-së të mos pranohet. Vendimet e Gjykatës Kushtetuese janë të formës së prerë dhe të detyrueshme për zbatim.