KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

REPLIKË

Në seancën e djeshme të Kuvendit u shtrua për diskutim edhe çështja e të drejtave të njeriut në Shqipëri. U muar shkas nga një interpelancë që z. Pjetër Arbnori i drejtoi kryeministrit z. Pandeli Majko. Me atë rast z. Arbnori bëri sulmin e radhës kundër Komitetit Shqiptar të Helsinkit, për të cilin tha se prej vitit 1997 ka mbajtur heshtje dhe nuk ka kryer më misionin e tij. Për pasojë këtij Komiteti i bëhet vërejtja se ka mbajtur anën e pushtetit në fuqi.

z. Arbnori injoron krejt veprimtarinë e KSHH të pasqyruar rregullisht në materialet e tij, në buletinet dhe raportet që kanë dalë rregullisht. Atij mund t'i sugjerohet të shikojë raportet vjetore të Departamentit të Shtetit të SHBA si dhe raportet e Federatës Ndërkombëtare të Helsinkit që i referohen shpesh informacionit dhe vlerësimeve që ka dhënë ky Komitet për probleme të ndryshme të të drejtave të njeriut në Shqipëri.

Opinioni është në dijeni se z. Arbnori është në krye të një Forumi të të drejtave të njeriut që është i atashuar pranë një partie politike. Në këtë rast ai konfondon dy çështje parimore. Ai nuk bën dallimin midis rolit të një organizate joqeveritare dhe jopartiake dhe të një strukture partiake si ajo që drejton ai. Në cilësinë e tij si përfaqësues i një partie z. Arbnori bën opozitë politike duke përdorur edhe temën e të drejtave të njeriut.

Ka një ndryshim thelbësor midis një strukture që mund të krijohet si një seksion i një partie dhe organizatave të cilat nuk janë as qeveritare as partiake. KSHH hyn në radhën e këtyre të fundit. Atij nuk i përket të bëjë opozitë politike duke marrë anën e kësaj apo asaj partie. KSHH bën vetëm oponencë në sferën e të drejtave të njeriut dhe e bën këtë në dy drejtime. Së pari, duke vëzhguar dhe denoncuar shkeljet e të drejtave të njeriut (i sugjerojmë edhe një herë z. Arbnori të shikojë botimet e shumta që kanë dalë në dritë me prononcime publike). Së dyti, duke sensibilizuar opinionin e gjërë por edhe organizmat e ndryshme shtetërore për respektimin e të drejtave të njeriut dhe të parimeve bazë të shteti ligjor.

Duke shprehur një mendim të përgjithshem duhet thënë se në Shqipëri ka mjaft probleme dhe shkelje të të drejtave të njeriut dhe ato duhen identifikuar e denoncuar pa ngurrim. Këtë mision KSHH e ka kryer dhe e kryen që prej themelimit të tij, si e para organizatë e të drejtave të njeriut në Shqipëri. Por çështja e të drejtave të njeriut është një proces dhe nuk mund të mohohet se gjatë viteve janë arritur përmirësime në këtë fushë.

16.04.2002