KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Selenica paralajmërim për masa të efektshme parandaluese

25.02.2004

Ngjarja e ndodhur në minierën e Selenicës dhe pasojat e saj tronditën rëndë opinionin e gjerë shoqëror. Komiteti Shqiptar i Helsinkit u shpreh dhimbjen e thellë dhe ngushëllimet e sinqerta familjarëve të viktimave si dhe shërim të shpejtë të aksidentuarve që vazhdojnë të kurohen brenda dhe jashtë vendit.

KSHH nuk paragjykon shkakun e këtij aksidenti dhe as përgjegjësinë që mund të kenë persona të veçantë. Kjo është çështje që duhet  të zgjidhet nga organet kompetente. KSHH përshëndet Prokurorin e rrethit të Vlorës që veproi menjëherë dhe që ndaloi personat e dyshuar për shkeljen e rregullave të mbrojtjes në punë që ka shkaktuar vdekjen dhe dëmtimin e rendë të disa punonjësve. Me këtë rast, KSHH i bën  thirrje organit, që në përputhje me ligjin ta hetojë atë shpejt dhe me objektivitet.

Kjo ngjarje me pasoja të rënda mori jetën e 6 personave. Nga ky aksident u dëmtuan edhe shumë të tjerë. Duke marrë shkas nga ky rast tragjik, KSHH e sheh të nevojshme të theksojë se ende në vendin tonë respektimit të legjislacionit dhe akteve të tjera nënligjore nuk i kushtohet vëmendje e veçantë, edhe pse dihet se jeta dhe shëndeti i njeriut janë pasuritë më të mëdha.

Vëzhgimet e mëparshme të KSHH-së në sektorë të ndryshëm, kanë evidentuar shkelje të rregullave të sigurimit në punë, të mospajisjes së punëtorëve me mjetet e nevojshme, etj. Kontrolli i organeve përkatëse në këtë drejtim nuk ka qenë në nivelin e duhur.

KSHH thekson se e keqja tek ne nuk qëndron tek mungesa e legjislacionit, por tek moszbatimi i tij rigoroz, tek nënvleftësimi dhe lëshimet që bëhen për shkak të indiferentizmit apo interesave të tjera.

KSHH me keqardhje vëren se e keqja tek ne qëndron në faktin se organet përkatëse vihen në lëvizje kur ndodh e keqja, në një kohë kur asaj duhet t’i dilet përpara, të parandalohet. Ngjarja e rëndë e Selenicës duhet të shërbejë si reflektim për të marrë masa efikase në mbrojtje të shëndetit dhe të jetës së njeriut. KSHH i kërkon drejtuesve të sektorëve të ekonomisë apo sipërmarrësve të ndryshëm, të mos spekullohet me nevojën e punëtorëve për t’u punësuar. Në këtë drejtim, masat ndaj shkelësve të ligjit duhet të jenë të ashpra.