KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

AKT TERRORIST

KUNDËR DELEGACIONIT SHQIPTAR NË BRUKSEL

26.01.2002 

Në Bruksel me rastin e vizitës së delegacionit shqiptar, lidhur me bisedimet për marrëveshjen e asocimit të Shqipërisë në komunitetin evropian, ndodhi një akt pa precedent. Një grup personash që janë të inkriminuar në Shqipëri sulmuan një numër delegatësh shqiptarë, në një ndër hotelet kryesore të kryeqytetit belg, duke i keqtrajtuar egërsisht. Sipas të gjitha të dhënave viktima të goditjes kanë qenë një numër politikanësh, të njohur si anëtarë të qeverisë ose pranë saj. Në këtë mënyrë akti ka patur motive politike të drejtuara kundër një pjese të sferës politike në Shqipëri.

Disa prej delegatëve janë dëmtuar seriozisht dhe i janë nënshtruar edhe trajtimit mjekësor.

Ky akt pa precedent pasqyron praninë e elementeve të dhunshme, që synojnë të ndërhyjnë në politikë, të shtyrë nga ndjenjat e intolerancës dhe e konfrontimit, madje edhe fizik.

Është njohur përgjithësisht se ky akt dëmton imazhin e Shqipërisë, si shtet që kërkon të hyjë në Evropë.

Ai shtron në rradhë të parë detyrën e gjyqësorit shqiptar që të vërë rregull në rradhët e tij dhe të mos lejojë që personat e inkriminuar të lënë vendin dhe të shkojnë jashtë duke u paraqitur si azilantë politikë, për t'u bërë pastaj organizatorë aktesh të tilla kriminale. Është gjithashtu e domosdoshme që autoritetet shqiptare të sqarojnë ndodhinë, me kujdesin më të madh, për t'i shkuar së vërtetës deri në fund. Është e domosdoshme që të kërkohen shpjegime nga autoritetet belge, të cilat nuk kishin marrë masat e duhura në mbrojtje të delegatëve shqiptarë. Është njoftuar se në këtë rast nuk ka patur forca të rendit në hotel. Çështja ka, pra, edhe karakter ndërkombëtar dhe si e tillë duhet të trajtohet për të përcaktuar përgjegjësitë.

KSHH e denoncon me forcë këtë akt terrorist të organizuar nga elementë të papërgjegjshëm ekstremistë, që i janë shmangur drejtësisë në Shqipëri. Shprehim bindjen se autorët e këtij akti të shëmtuar do t'i dorëzohen drejtësisë shqiptare ashtu siç e parashikojnë ligjet shqiptare për shtetas që kryejnë krime jashtë territorit shqiptar.

KSHH shpreh po ashtu bindjen se ky incident i rëndë nuk do të ketë peshë në jetën politike të vendit dhe se do të përballohet me maturi. Incidenti nuk do të cënojë disa nga detyrat e rëndësishme politike që shtrohen në këtë fazë. Funksionimin e parlamentit me të gjithë përbërjen e tij e pret gjithë opinioni publik. Le të jetë kjo përgjigjia më e mirë kundrejt orvatjeve të elementëve ekstremistë për ta kthyer nga rruga këtë proces.