KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Tragjedi me pasoja tepër të rënda

11.01.2004

Mbarë opinioni publik shqiptar është vënë në dijeni për tragjedinë e rëndë që ndodhi në ujërat e detit Jon, ku në një gomone të nisur drejt brigjeve të Italisë gjetën vdekjen 21 shtetas shqiptarë. Ky lajm ishte sa tronditës aq edhe i dhimbshëm. Komiteti Shqiptar i Helsinkit i shpreh ngushullimet e veta të gjithë familjarëve dhe të afërmëve të viktimave të kësaj tragjedie, ndërsa të mbijetuarve i uron shërim të shpejt.

Ngjarja e mësipërme është një provë tjetër që tregon se krimi i organizuar, pjesë e të cilit është edhe trafiku i qënieve njerëzore mund të goditet ose edhe të tërhiqet përkohësisht, por përsëri ai mund të organizohet dhe të veprojë.

Nga ana tjetër, vihet re ende shqiptarëve u duhet kohë të realizojnë të drejtën e tyre për të lëvizur lirshëm dhe t’u krijohen mundësitë për t’u pajisur me viza të rregullta udhëtimi për jashtë shtetit. 

Komiteti Shqiptar i Helsinkit konstaton se forca zbuluese kundër krimit të organizuar, bashkërendimi i punës së institucioneve të specializuara në këtë fushë lë shumë për të dëshiruar.

1. Komiteti Shqiptar i Helsinkit denoncon vetkënaqësinë, dukuri kjo e shprehur edhe në ndonjë deklaratë qeveritare si dhe mendimin se trafiku i qënive njerëzore është në nivele zero. Tragjedia e fundit tregoi se prirje të tilla mund të shoqërohen me pasoja të dëmshme për jetën e njerëzve dhe stabilitetin e vendit.

2. Komiteti Shqiptar i Helsinkit i bën thirrje organeve të specializuara në luftën kundër krimit, sidomos atij të organizuar, që të rrisin aftësitë profesionale, të zbulojnë dhe të godasin në përputhje me ligjin, jo vetëm ekzekutorët por edhe organizatorët e bashkëpunëtorët e krimit si dhe të gjithë ata që me qëndrimet e tyre pasive dhe toleruese favorizojnë kryerjen e krimeve me rrezikshmëri të theksuar shoqërore.

3. Komiteti Shqiptar i Helsinkit i bën thirrje organeve drejtuese të Ministrisë së Rendit Publik të pastrojnë rradhët e policisë dhe strukturave të tjera të kësaj Ministrie nga njerëzit e inkriminuar dhe të korruptuar që me qëndrimet dhe veprimet e tyre, ndihmojë, favorizojnë ose nxisin krimin e organizuar si pastrojnë rradhët e tyre edhe nga ata që tolerojnë ndaj elementëve keqbërës.

4. Komiteti Shqiptar i Helsinkit, duke marrë shkas nga kjo tragjedi e përsëritur, e sheh të nevojshme t‘i referohet vjetarit statistikor të Ministrisë së Drejtësisë për vitin 2002, sipas të cilit rezulton se gjykatat shqiptare nuk kanë dënuar asnjë person për trafik të qënieve njerëzore, figurë krimi e parashikuar nga neni 110/a i Kodit penal. Komiteti Shqiptar i Helsinkit i bën thirrje gjithashtu, organeve të drejtësisë që të zbatojnë një politikë të ashpër dënimi ndaj organizatorëve, ekzekutorëve dhe bashkëpunëtorëve në krime të tilla.

5. Komiteti Shqiptar i Helsinkit i drejtohet në mënyrë të përsëritur Qeverisë shqiptare për të treguar kujdes të veçantë në drejtim të mbrojtjes së dinjitetit të shqiptarëve. Qeveria shqiptare duhet të bëjë pëpjekje maksimale që edhe shtetasit shqiptarë të trajtohen në mënyrë të barabartë lidhur me dhënien e vizave.

Kriminaliteti është një fenomen që nuk zhduket me deklarata apo vetëm me fushata. Parandalimi i tij kërkon masa efikase dhe rritje të përgjegjësisë, forcim të luftës kundër korrupsionit, rritje të profesionalizmit të organeve të specializuara, konsolidim të organeve shtetërore si dhe sensibilizim të vazhdueshëm të publikut.

Duke falenderuar median shqiptare për informimin e shpejtë dhe pasqyrimin e kësaj tragjedie, Komiteti Shqiptar i Helsinkit do të jetë një partner i saj  dhe do  të vazhdojë të denoncojë pa hezitim rastet korruptive dhe abuzimeve të punonjësve të administratës publike, qofshin këta funksionarë apo politikanë duke kontribuar kështu në parandalimin e fenomeneve të tilla.