KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Tubimet apo revoltat e dhunshme janë antikushtetuese

29.03.2004

Komiteti Shqiptar i Helsinkit, tubimet e fundit të opozitës i ka konsideruar të ligjshme dhe paqësore ashtu siç ka vlerësuar në përputhje me ligjin edhe qëndrimin e forcave të rendit.
         Në një vend demokratik siç është edhe Shqipëria, kushdo gëzon të drejtën e lirisë së mbledhjeve dhe manifestimeve paqësore për të shprehur pakënaqësitë e mundshme apo kërkesat e ndryshme ndaj qeverisë, institucioneve apo organeve të caktuara shtetërore.
         Konventa Europiane e të Drejtave të Njeriut (neni 11) dhe Kushtetuta e Republikës së Shqipërisë (nenet 46 dhe 47) garantojnë të drejtën e organizimit kolektiv për çfarëdo qëllimi të ligjshëm si dhe lirinë e tubimeve paqësore. Në nenin 47 të Kushtetutës theksohet se “tubimet paqësore në sheshe dhe në vendet e kalimit publik bëhen sipas procedurave të parashikuara në ligj”. Pikërisht për këtë arsye është miratuar dhe ligji “Mbi tubimet”.
         As dokumentat ndërkombëtar, as Kushtetuta jonë dhe as ligji “Mbi tubimet” nuk lejojnë që tubimet e ligjshme të degjenerojnë në dhunë në çfarëdo forme që të paraqitet ajo. Këtë e kanë parasysh edhe organizatorët e tubimeve. Si rrjedhim, nuk mund të merren në mbrojtje tubimet që synojnë prishjen e rendit publik apo cënimin e interesave të të tjerëve.
         Në këtë vështrim, KSHH-ja vlerëson të nxituar deklaratën e datës 27.3.2004 të Z. Preç Zogaj, kryetar i grupit parlamentar “Aleanca për demokraci”, ku është shprehur se në qoftë se qeveria nuk refekton ndaj tubimeve të organizuara nga opozita, “protestat evoluojnë në revolta dhe në kryengritje dhe këtu pastaj ka pak vend për drejtim politik”. Edhe pse ai thekson se rritja e revoltës vjen vetvetiu pa qënë nevoja për të bërë thirrje për kryengritje, në fakt ai e justifikon atë.
         KSHH-ja nuk pajtohet më këtë arsyetim edhe për faktin sepse qoftë edhe indirekt deklarata të tilla inkurajojnë veprime të kundraligjshme. Komiteti Shqiptar i Helsinkit mbështet deklaratën e Nënkryetares të Partisë Demokratike Znj. Josefina Topalli se: “Në asnjë rast nuk do të lejojmë që situata në vend të dalë jashtë kontrollit” se “ Kjo nuk është as në të mirën e stabilitetit në vend, as në tonën”.
         Megjithatë, KSHH i bën thirrje qeverisë që të vlerësojë kërkesat dhe ankesat e ligjshme të shtetasve dhe sidomos ato që kanë të bëjnë me preokupacionet e tyre të përditshme të karakterit social - ekonomik.