KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Më tepër vetpërmbajtje në shprehjet ndaj institucioneve

10.12.2003

 Komiteti Shqiptar i Helsinkit vëren me shqetësim se liderë apo përfaqësues të partive politike tregohen të papërmbajtur në kritikat dhe akuzat që ata bëjnë në adresë të institucioneve kushtetuese. Ata shpesh e paragjykojnë veprimtarinë e tyre duke u nisur thjesht nga interesat e ngushta partiake.

Nuk ishte as e pranueshme dhe as e përshtatshme që lideri i Partisë Socialiste menjëherë pas vendimit të Kolegjit Zgjedhor të Gjykatës së Apelit Tiranë, për përsëritjen e zgjedhjeve në 118 qendra votimi, e akuzoi atë si të korruptuar.

Nuk është gjithashtu e lejueshme që lideri i Partisë Demokratike dhe përfaqësues të tjerë të kësaj partie, ndaj Komisionit Qëndror të Zgjedhjeve vazhdojnë të përdorin shprehje të dhunshme dhe akuza të pavërtetuara nga organet kompetente. Kjo mospërmbajtje paragjykuese bie haptazi ndesh me parimin e rëndësishëm të prezumimit të pafajësisë të sanksionuar në Konventën Evropiane të të Drejtave të Njeriut dhe në Kushtetutën tonë.

Komiteti Shqiptar i Helsinkit denoncon gjithashtu gjuhën e urrejtjes pavarësisht nëse ajo përdoret nga spektri i majtë apo i djathtë. E shikojmë të nevojshme të theksojmë se dukuri të tilla nuk pajtohen me normat e një shoqërie dhe të një vendi demokratik që aspiron integrimin në familjen e madhe Evropiane.


Tiranë, më 10 Dhjetor 2003