|
Zvarritje
e pafalshme
13.06.2005
Komiteti Shqiptar i Helsinkit (KSHH)
bashkohet me shqetësimin e shprehur nga Kryetari i
KQZ-së, Z. Ilirjan Celibashi lidhur me vonesën e dhënies
së informacionit përkatës nga kryetarët e njësive të
qeverisjes vendore për numrin e saktë të zgjedhësve në
bazë zone dhe për çdo qendër votimi.
KSHH mendon se këtij shqetësimi mund
ti paraprinte Ministria e Pushtetit Vendor dhe
Decentralizimit.
Masat administrative ose penale që
tani mund të merren ndaj shkelësve të ligjit, edhe pse
të nevojshme, nuk janë kryesoret. KSHH mendon se
kryesorja ishte parandalimi i shkeljes.
KSHH bashkohet gjithashtu me
shqetësimin e KQZ-së se vonesa e mësipërme është e tillë
që mund të kompromentojë një nga aspektet më të
rëndësishme të zgjedhjeve, atë të votimit. Prandaj, edhe
kërkohet që ky problem të vlerësohet me seriozitetin e
duhur.
Të gjithë flasin, pranojnë dhe
deklarojnë se zgjedhjet e këtij viti do të jenë një test
për Shqipërinë, se ato duhet të përmbushin standardet e
kërkuara.
KSHH edhe më parë ka theksuar se
arritja e këtyre standardeve kushtëzohet nga dy faktorë:
a) nga vullneti politik dhe b) nga zbatimi rigoroz i
ligjit.
Nga zgjedhjet e 3 korrikut na ndajnë
vetëm 20 ditë. Deri ditën e votimit ka çështje të
rëndësishme që duhen zgjidhur, ka afate që duhen
respektuar. Mjafton të përmendim një nga momentet më të
rëndësishme: atë të ngritjes në kohë të grupeve të
numërimit të votave sidhe trajnimin cilësor të anëtarëve
të tyre.
KSHH, me këtë rast u bën thirrje
organeve përkatëse shtetërore, komisioneve zgjedhore dhe
të gjithë subjekteve zgjedhore që të kontribuojnë në
drejtim të zbatimit të ligjit dhe udhëzimeve të KQZ-së.
Procesi zgjedhor ka hyrë në fazën përfundimtare. Le të
vërtetojmë në praktikë, se edhe ne dimë të bëjmë
zgjedhje të lira, të ndershme dhe të pakontestueshme.
|
