KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Më tepër përpjekje për korrigjimin e listave të zgjedhësve

Tiranë, më 17.09.2003

Në shtypin e përditshëm dhe në deklaratat e disa drejtuesve të partive politike, jepen njoftime për pasaktësi të shumta në listat e zgjedhësve dhe sidomos për qindra, madje mijëra persona që nuk figurojnë në listat e shpallura.

KSHH nuk paragjykon as saktësinë dhe as gjerësinë e këtyre të dhënave.  Megithatë në një kohë kur mbeten edhe pak ditë nga përfundimi i afatit ligjor të verifikimit të listave paraprake, konsiderojmë të domosdoshme dhe urgjente shfrytëzimin e mundësive ligjore për korrigjimin e tyre.

KSHH mendon se vetë zgjedhësi i interesuar në ushtrimin e të drejtës së votës, duhet të njihet me këto lista dhe kur është e nevojshme, t'i drejtohet KZQV-së përkatëse për korrigjimin e saj.  Veç kësaj, sipas nenit 58 të Kodit Zgjedhor, të drejtën për të kërkuar ndryshime në listat paraprake, e kanë edhe partitë politike, subjektet zgjedhore dhe institucionet e tjera të interesuar.

Në këtë drejtim, KSHH vlerëson udhëzimet e KQZ-së lidhur me këtë çështje, si edhe nismën e programuar të tij për sensibilizimin e opinionit shoqëror nëpërmjet medias të shkruar dhe elektronike.

KSHH mendon se pavarësisht nga vështirësitë dhe mungesat e vërejtura, ekzistojnë mundësitë që listat e shpallura të plotësohen dhe të saktësohen me qëllim që zgjedhësit të jenë të sigurt se emri i tyre figuron në listën përkatëse të zgjedhësve.