KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Kur do të ngrihen dhe kur do të trajnohen grupet e numërimit të votave?!

24.06.2005

Komiteti Shqiptar i Helsinkit, edhe pse vetëm 9 ditë na ndajnë nga dita e votimit, e shikon të nevojshme të shprehë për herën e fundit shqetësimin e vet se nëqoftëse grupet e numërimit të votave do të ngrihen dy orë para mbylljes së votimeve, trajnimi i 3200 – 4000 anëtarëve të tyre do të jetë i pamundur.

Për KSHH-në, asgjë nuk i pengonte KZZ-të që fill pas ngritjes së tyre, të caktonin numrin e grupeve të numërimit të votave dhe këtë vendim t’ua komunikonin partive politike që do të bënin propozimet përkatëse.

Vendimet e KZZ-ve në këtë rast do të ishin në përputhje me nenin 95/2 pika 1 e Kodit Zgjedhor ku thuhet se: “Për numërimin e votave në rang njësie zgjedhore, me vendim të KZZ-së … jo më vonë se 2 orë para mbylljes së votimit … caktohen deri në 5 grupe numërimi me shtatë anëtarë dhe një sekretar secili”.

Veç kësaj, qysh në datën 23 mars 2005, KQZ-ja miratoi udhëzimin që detyronte KZZ-të që jo më vonë se 5 ditë nga data e votimit të caktonin numrin e grupeve të numërimit të votave dhe këtë vendim t’ua njoftonin menjëherë partive politike përkatëse.

Asgjë nuk i pengonte KZZ-të që këtë vendim ta merrnin të themi brenda muajit Maj ose në ditët e para të qershorit 2005.

KSHH mendon, se nuk ka asnjë jusitifikim që lidhur me nenin 95/2 pika 1 të Kodit zgjedhor dhe udhëzimit të KQZ-së të datës 23 Mars 2005, të zbatohen afatet e fundit duke vënë kështu në pikëpyetje trajnimin e anëtarëve të grupeve të numërimit të votave.

KSHH siç dihet, që në fillim, ka parashtruar observacionet e tij lidhur me dispozitën e mësipërme të Kodit zgjedhor.

KSHH ka shprehur gjithashtu mendimin se edhe pse nga pikëpamja formalo – ligjore ngritja e grupeve të numërimit 2 orë para mbylljes të votimit nuk do të konsiderohej shkelje, zbatimi i këtij afati të fundit në mënyrë evidente do të përjashtonte mundësinë e trajnimit.

KSHH vazhdon ta quajë të gabuar dhe me pasoja mendimin se meqë sipas Kodit Zgjedhor, kontestimet që mund të vërtetoheshin gjatë procesit të numërimit të votave, do të zgjidheshin nga KZZ-ja, do të mjaftonte vetëm një trajnim, shumë i shpejtë i grupeve të numërimit (për të mos thënë se ky trajnim edhe mund të mos bëhej fare).

KSHH nuk mund të konceptojë këtë “justifikim” dhe do ta konsideronim me pasoja të dëmshme atë që mund të ndodhë: trajnimin formal ose motrajnimin.

KSHH ka parasysh se me procesin e rëndësishëm dhe delikat të numërimit të votave që kërkon aftësi, objektivitet, transparencë dhe operativitet, ligji ngarkon vetëm grupet e numërimit të votave, madje vlen të theksohet se janë ata që do të evidentojnë cilat vota janë të vlefshme dhe cilat janë të pavlefshme, se janë ata që do të plotësojnë tabelën e rezultateve për çdo qendër votimi.

KSHH mendon se të angazhosh në këtë proces (me vendim të KZZ-ve) persona të propozuar nga partitë politike, por që nuk njohin detyrat e tyre ligjore, do të thotë të tolerosh ose të pranosh ushtrimin e një detyre në mënyrë mekanike dhe të papërgjegjshme.

KSHH ka mendimin, se edhe në këto pak ditë që na ndajnë nga zgjedhjet e 3 korrikut, mund të reduktohen vështirësitë e mësipërme dhe të parandalohen pasojat e mundshme.

Pikërisht, për këtë arsye, KSHH e shikon të nevojshme t’u sugjerojë KZZ-ve që ende nuk kanë vendosur numrin e grupeve të numërimit si dhe partive politike që kanë të drejtën e propozimeve por që ende nuk i kanë paraqitur ato, ta vlerësojmë seriozisht këtë problem.

KSHH me këtë rast i sugjeron gjithashtu KQZ-së që në zbatim të funksioneve të tij kushtetuese dhe ligjore si dhe në kuadrin e mbikqyrjes dhe verifikimit të aspekteve të ndryshme të procesit zgjedhor, ta ndjekë me përparësi këtë çështje me qëllim që qoftë edhe një apo dy ditë para zgjedhjeve të mundësoshet trajnimi i të gjithë anëtarëve të grupeve të numërimit të votave.