|
Tryezë
e rrumbullakët me me specialistë të fushës ligjore e
konstitucionale si dhe me përfaqësues të shoqërisë
civile të angazhuar në vëzhgimin e procesit zgjedhor në
Shqipëri
Përmirësimi i kodit zgjedhor
dhe respektimi i tij një domosdoshmëri
25.11.2003
Komiteti Shqiptar i Helsinkit,
organizatë joqeveritare, jofitimprurwse e të drejtave të
njeriut, anëtare e Federatës Ndërkombëtare të Helsinkit
ka për mision respektimin e lirive dhe të drejtave të
shtetasve dhe të kontribuojë në përmirësimin e
legjislacionit dhe të praktikave të respektimit të
lirive dhe të drejtave të shtetasve nga ana e
institucioneve të ndryshme shtetërore. Ky Komitet ka
qënë i angazhuar në vëzhgimet e proceseve zgjedhore të
zhvilluara gjatë këtyre viteve. Edhe për vëzhgimin e
zgjedhjeve e organeve të qeverisjes vendore të
zhvilluara me 12 tetor 2003, KSHH-ja aktivizoi 106
vëzhgues afatgjatë.
Menjëherë pas përfundimit të
zgjedhjeve, KSHH-ja ka dalë me raporte paraprake mbi
aspekte të veçanta të procesit zgjedhor. Së shpejti,
KSHH-ja do të botojë raportin përfundimtar mbi zgjedhjet
e organeve të qeverisjes vendore të 12 tetorit 2003.
Duke vlerësuar rëndësinë e Kodit
Zgjedhor dhe vullnetin politik për zbatimin e tij si dhe
problemet e konstatuara gjatë vëzhgimit të zgjedhjeve
për organet e qeverisjes vendore të 12 tetorit 2003, me
qëllim që të kontribuojmë në përmirësimin e zhvillimit
të proceseve zgjedhore në Shqipëri, në datën 22 nëntor
2003, KSHH-ja organizoi një tryezë të rrumbullakët me
specialistë të fushës ligjore e konstitucionale si dhe
me përfaqësues të shoqërisë civile të angazhuar në
vëzhgimin e procesit zgjedhor në Shqipëri.
Në këtë takim u shkëmbyen mendime
lidhur me disa çështje të rëndësishme të Kodit Zgjedhor
dhe zbatimit të tij në praktikë, për mungesat dhe
pasaktësitë në dispozita të veçanta të këtij kodi si dhe
për nevojën e përmirësimit të mëtejshëm të
legjislacionit zgjedhor me qëllim që të realizohen
zgjedhje të drejta, demokratike dhe të pakontestueshme
nga të gjitha forcat politike.
Pjesëmarrësit në këtë takim shprehën
mendime të ndryshme, por të dobishme lidhur me disa
përmirësime të nevojshme të Kodit Zgjedhor. Diskutime
dhe mendime u shkëmbyen për probleme të tilla si
organizimi dhe funksionimi i komisioneve të zgjedhjeve,
cilësitë që duhet të plotësojnë anëtarët e komisioneve
zgjedhore të qeverisjes vendore dhe atyre të qëndrave të
votimit, hartimi i listave të zgjedhësve, subjektet që
duhet të kenë të drejtë të bëjnë ndryshme në lista dhe
roli i partive politike në ndryshimet e listave me
qëllim që të shmangen mangësitë e vëna re në zgjedhjet e
12 Tetorit 2003.
Pjesëmarrësit në tryezë nënvizuan
nevojën e zbatimit rigoroz të Kodit Zgjedhor dhe ligjeve
të tjera si nga anëtarët e komisioneve zgjedhore,
organet shtetërore dhe subjektet politike si dhe
theksuan nevojën e forcimin e rolit të KQZ-së në
administrimin e proceseve zgjedhore në Shqipëri.
Në vazhdim, KSHH-ja dhe partnerët e
saj do të vazhdojnë të kontribuojnë në përmirësimin e
legjislacionit dhe proceseve zgjedhore në Shqipëri duke
vëzhguar jo vetëm shkeljet e të drejtave të shtetasve në
këtë fushë, por edhe duke nxitur frymën e respektimit të
ligjit, të lirive dhe të drejtave të shtetasve në
përgjithësi.
|
