KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Komiteti Shqiptar i Helsinkit përshëndet dhe vlerëson nismën e Presidentit të Republikës për fillimin e shpejtë të punës në drejtim të ndryshimeve të nevojshme të Kodit Zgjedhor

26.02.2004

Komiteti Shqiptar i Helsinkit përshëndet dhe vlerëson nismën e Presidentit të Republikës për fillimin e shpejtë të punës në drejtim të ndryshimeve të nevojshme të Kodit Zgjedhor dhe përmirësimin e infrastrukturës zgjedhore.
         Ambasadori i OSBE-së Z. Lipponen, në konferencën e shtypit të datës 14 Shkurt 2004, deklaroi se pas disa ditëve mund të njiheshim me raportin përfundimtar të OSBE/ODIHR-it lidhur me zhvillimin e zgjedhjeve të organeve të qeverisjes vendore të 12 Tetorit të vitit të kaluar në të cilin do të parashtroheshin edhe rekomandimet përkatëse.
         KSHH është organizata jo-qeveritare që ka vëzhguar të gjitha zgjedhjet parlamentare dhe vendore që janë zhvilluar deri më sot në vendin tonë.
         KSHH gjatë procesit zgjedhor dhe në përfundim të zgjedhjeve të 12 Tetorit 2003, ka publikuar raporte ku bëhet fjalë mbi aspektet e ndryshme të këtij procesi. Në këto raporte parashtrohen gjithashtu edhe sugjerime për nevojën e disa ndryshimeve në Kodin Zgjedhor.
         KSHH, edhe pse i ndërgjegjshëm se në hartimin dhe përsosjen e legjislacionit zgjedhor vullneti politik është i një rëndësie të veçantë, mendon se ky proces nuk mund të jetë monopol i partive politike, qofshin këto të pozitës apo të opozitës.
         KSHH, edhe më parë ka sugjeruar që në hartimin e projekteve kaq të rëndësishme siç është edhe Kodi Zgjedhor, do të ishte e dobishme të angazhoheshin një rreth i gjerë specialistësh me përvojë në këtë fushë. Kjo do të ishte gjithashtu një ndihmesë konkrete dhe efektive edhe për vetë komisionin dy-palësh që u krijua për këtë qëllim, madje edhe për Kuvendin. Në këtë mënyrë mund të evitohej miratimi i disa neneve që bien ndesh me Kushtetutën ose i disa dispozitave të tjera të Kodit në fuqi formulimi i të cilave nuk është i plotë dhe i saktë. Dhe si rrjedhim lënë shtigje për interpretime subjektive dhe arbitare.
         KSHH  mendon dhe sugjeron që projekti i ndryshimeve të Kodit Zgjedhor të përgatitet paraprakisht nga një grup specialistësh jo-partiakë, e fill pas kësaj të vihej në lëvizje mekanizmi parlamentar, komisioni apo komisionet përkatëse, dhe në përfundim të miratohej në senacën plenare. Ne kemi besim që në frymën e debatit konstruktiv, të mirëkuptimit dhe të konsensusit sa më të gjerë të forcave politike, në zbatim të Kushtetutës dhe të dokumentave ndërkombëtare, përmirësimi i mëtejshëm i legjislacionit zgjedhor të ndikonte pozitivisht në arritjen e objektivit kryesor: garantimin e zgjedhjeve të lira, demokratike dhe të pakontestuara.
         KSHH mendon gjithashtu se hartimi i listave të zgjedhësve i mbështetur në të dhëna të plota dhe të sakta të dokumentave zyrtare të parashikuara në ligje, kërkon marrjen e masave të menjëhershme. Ky proces është sa i vështirë, aq edhe delikat që kërkon angazhim serioz të organeve shtetërore dhe transparencë. Në të kundërtën, vonesat apo lënia pas dore e këtij problemi nuk përjashtojnë mundësinë që edhe në zgjedhjet e ardhshme të jenë të pranishme kontestimi dhe pakënaqësitë, gjë që do të ndikonte në acarimin e klimës politike duke cënuar edhe imazhin e vendit tonë.