KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Zgjedhësit dhe subjektet zgjedhore kanë të drejtën e ankimit

27.06.2005

Komiteti Shqiptar i Helsinkit (KSHH), në bazë të informacioneve të vëzhguesve të tij, ka ndjekur me vëmendje faktin se një numër jo i vogël zgjedhësish nuk e kanë emrin e tyre në listat përfundimtare që janë shpallur.

KSHH e vlerëson seriozisht këtë çështje. Mangësitë në këtë drejtim ndikojnë në ushtrimin ose jo të së  drejtës së votimit-si një e drejtë themelore e shtetasve.

Edhe pse 6 ditë na ndajnë nga dita e votimit, KSHH i bën thirrje të gjithë zgjedhësve që nuk figurojnë në listat përfundimtare t’i drejtohen gjykatës së rrethit gjyqësor përkatës me kërkesën për t’i lejuar ata që të votojnë në qendrën e tyre të votimit. Zgjedhësit e mësipërm duhet ta kenë të qartë se organi i vetëm kompetent për të vendosur lidhur me një çështje të tillë është gjykata përkatëse e rrethit.

KSHH, nëpërmjet kësaj deklarate, dëshiron të njoftojë dhe t’u bëjë të qartë zgjedhësve se sipas nenit 60 të Kodit Zgjedhor ata mund të paraqesin kërkesën në gjykatë deri në 24 orë përpara datës së zgjedhjeve, d.m.th. deri ditën e premte datë 1 Korrik 2005, ora 24:00. Zgjedhësit gjithashtu, duhet të dinë se gjykata mund t’i shqyrtojë këto çështje edhe ditën e fundit para zgjedhjeve, madje edhe në ditën e zgjedhjeve por jo më vonë se 6 orë përpara mbylljes së votimit.

Zgjedhësit e kësaj kategorie duhet ta kenë të qartë gjithashtu se kjo procedurë do të jetë e thjeshtë dhe e shpejtë, mjafton që ata t’i bashkangjisin kërkesës edhe vërtetimet përkatëse.

Me vendimin që pranon kërkesën e tyre, zgjedhësit kanë të drejtë të shkojnë në qendrën e votimit dhe të votojnë si gjithë të tjerët, pavarësisht se në listën që ka KQV-ja nuk figuron emri i tyre.

KSHH, duke marrë shkas nga çështja e mësipërme, e shikon të nevojshme të trajtojë edhe të drejtën që kanë subjektet zgjedhore d.m.th. partitë politike, koalicionet partiake, kandidatët e tyre dhe kandidatët e pavarur për t’u ankuar sipas rastit në KQZ ose në Kolegjin Zgjedhor të Gjykatës së Apelit Tiranë në ato raste kur ata pretendojnë se u janë cënuar interesat e tyre të ligjshme.

I tillë ka qenë edhe qëndrimi i OSBE/ODIHR-it për zgjedhjet parlamentare të vitit 2001, ku rekomandohej që subjektet zgjedhore kur mendojnë se u preken interesat e tyre kanë të drejtë të ankohen në instancat përkatëse të vendit dhe kur është rasti deri edhe në Gjykatën e Strasburgut.

KSHH e përmend këtë çështje meqë ndodhemi në prag të zgjedhjeve dhe shumë shpejt do të fillojnë ankesat drejtuar KQZ-së kundër vendimeve të KZZ-së si dhe ankesat drejtuar Kolegjit Zgjedhor të Gykatës së Apelit kundër vendimeve të KQZ-së.

KSHH mendon se të gjithë por në rradhë të parë dy forcat më të mëdha poltitike, duhet të mësojnë edhe nga përvoja negative e zgjedhjeve të mëparshme ku nuk kanë munguar edhe presionet apo akuzat e natyrës politike ndaj institucioneve të tilla kushtetuese siç janë: Gjykata Kushtetuese, Gjykata e Lartë, KQZ-ja dhe në ndonjë rast edhe ndaj Kolegjit Zgjedhor të Gjykatës së Apelit Tiran që u krijua në vitin 2003.

Këto fenomene të padëshirueshme kanë ndodhur vetëm sepse ky apo ai vendim i dhënë prej organeve të mësipërme nuk i ka pëlqyer kësaj ose asaj force politike.

KSHH është i ndërgjegjshëm se të kontestosh ose të kritikosh një vendim gjyqësor është normale, por t’u bësh presion KQZ-së, Gjykatës Kushtetuese, Gjykatës së Lartë dhe Kolegjit Zgjedhor, nuk është e pranueshme. Këto organe veprojnë në bazë të dispozitave përkatëse kushtetuese dhe ligjore, pavarësisht nga gabimet apo shkeljet e mundshme.

Për të parandaluar fenomene të tilla që mund të ndikojnë negativisht në acarimin e klimës politike në vend edhe në zgjedhjet e këtij viti, KSHH e shikon me vend t’I referohet nenit 145 të Kushtetutës ku thuhet se: “Gjyqtarët janë të pavarur dhe u nënshtrohen vetëm Kushtetutës dhe ligjeve” se “Ndërhyrja në veprimtarinë e Gjykatës ose të gjyqtarëve passjell përgjegjësi sipas ligjit”.

Të gjithë janë të detyruar të zbatojnë këtë dispozitë.