KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

8 KORRIK: TË KONSOLIDOHET MË TEJ IMAZHI I DEMOKRACISË SHQIPTARE

03.07.2001

Më 8 korrik do të zhvillohet raundi i dytë i zgjedhjeve. Ky raund i dytë merr një rëndësi vendimtare meqënëse vetëm në përfundim të tij do të dalë rezultati përfundimtar i zgjedhjeve.

Duke patur parasysh rëndësinë e veçantë të raundit të dytë të zgjedhjeve, KSHH para së gjithash u bëri thirrje votuesve të marrin pjesë aktivisht në zgjedhje, për të përmbushur të drejtën dhe detyrën e tyre qytetare. Pjesëmarrja sa më e gjerë e votuesve në zgjedhje është një kusht i domosdoshëm dhe nevojë e dorës së parë për rezultatin përfundimtar të zgjedhjeve të filluara në 24 qershor.

Së dyti, KSHH u bën thirrje të gjitha subjekteve elektorale të tregojnë vetëpërmbajtje dhe maturi ashtu si u treguan në raundin e parë, në përpjekjet e tyre për të siguruar rezultatet e pritura. prej tyre. Subjektet duhet të shmangin incidentet që mund të cënojnë atmosferën e përgjithshme paqësore të fushatës dhe të ditës së zgjedhjeve.

Veç asaj, KSHH u drejtohet strukturave zgjedhore që të përmbushin me rreptësi dhe korrektësi ligjin, të sigurojnë një ecuri sa më normale të shprehjes së vullnetit të lirë të votuesve, të trajtojnë me objektivitet problemet rastësore që mund të dalin në këtë fazë të dytë të zgjedhjeve. Një përgjegjësi e veçantë i takon Komisionit Qendror të Zgjedhjeve, prej të cilit pritet ta kryejë detyrën me po atë paanshmëri dhe profesionalizëm si në raundin e parë të zgjedhjeve. Anëtarët e komisioneve zonale dhe të qendrave të votimit duhet ta ndjejnë përgjegjësinë e madhe që u ngarkon ligji dhe të mos bien pre e ndikimeve partiake.

Jo më pak përgjegjësi kanë forcat e rendit, të cilat sipas të gjitha gjasave do të ballafaqohen me po ato probleme e vështirësi si edhe në fazën e parë të zgjedhjve të 24 qershorit.

KSHH shpreh bindjen se me përpjekjet e të gjithë faktorëve të raundit të dytë të zgjedhjeve do të ruhet e do të përforcohet imazhi i demokracisë shqiptare. Duhen bërë përpjekje nga të gjithë që vlerësimi i zgjedhjeve në tërësi nga komuniteti ndërkombëtar të konsolidohet më tej si një arritje tjetër madhore e Shqipërisë në rrugën e progresit drejt standarteve më të përparuara të vendeve demokratike.