KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Thirrje e Komitetit Shqiptar të Helsinkit Drejtuar të gjitha partive politike

Tiranë, 3 maj 2004

Komiteti Shqiptar i Helsinkit (KSHH) me keqardhje konstaton se ende partitë politike nuk po ndërmarrin hapa konkretë për të diskutuar raportin e OSBE/ODIHR-it dhe rekomandimet përkatëse lidhur me zgjedhjet e vitit të kaluar.

Siç dihet, nga zgjedhjet e Tetorit të vitit 2003 kanë kaluar afërsisht 7 muaj. Ka mbi 2 muaj që është bërë i njohur raporti i OSBE/ODIHR-it. Ndodhemi para zgjedhjeve të ardhshme parlamentare e megjithatë, veç disa deklaratave që pjesërisht janë akuza të ndërsjellta partiake, nuk ka asnjë nismë që të tregojë se partitë politike po angazhohen seriozisht me përgatitjet që do të garantonin zgjedhje të lira, të ndershme dhe të pakontestuara.

Përvoja negative e zgjedhjeve të vitit të kaluar, pa mohuar arritjet, vërtetoi se vonesat në hartimin dhe miratimin e Kodit të ri Zgjedhor si dhe mungesa e vullnetit politik u shoqëruan me pasoja të dëmshme në të gjitha aspektet e procesit zgjedhor. Do të ishte e pajustifikuar dhe e pafalshme që të përsëritej e njëjta gjë kur dihet se ne jemi në provë, se zgjedhjet e ardhshme do të jenë një test i rëndësishëm drejt integrimit të Shqipërisë në familjen e madhe Evropiane.

KSHH shpreh gjithashtu shqetësimin e tij se atmosfera në vend është e acaruar. Në këto kushte vështirësohet dialogu partiak në një kohë kur përmirësimet në legjislacionin zgjedhor kërkojnë përpjekje të përbashkëta dhe serioze, mirëkuptim, tolerancë dhe respektim të mendimit të kundërt.

KSHH përshëndet nismën e Presidentit si dhe çdo nismë tjetër që do t’i shërbente zbutjes së klimës politike në vend dhe që do të kontribuonte në zhvillimin e zgjedhjeve të lira dhe demokratike.

KSHH si një organizatë e pavarur dhe me përvojë në fushën e monitorimit të zgjedhjeve, ashtu si në të kaluarën, është i gatshëm të japë kontributin e tij modest në përmirësimin e mëtejshëm të legjislacionit zgjedhor.

KSHH vlerëson në mënyrë të veçantë si rekomandimet e OSBE/ODIHR-it, edhe komentet e nivelit përgjithësues dhe cilësor të ODIHR-it dhe Komisionit të Veneceias lidhur me disa dispozita të Kodit Zgjedhor.

KSHH është gjithashtu i bindur se përvoja dhe kontributi i specialistëve dhe ekspertëve tanë në këtë fushë do të ishin gjithashtu të dobishme.

Me këtë rast, KSHH i bën edhe një herë thirrje Qeverisë që të rrisë angazhimin e saj për të përmbushur detyrimet ligjore që ajo ka, lidhur me përgatitjet dhe zhvillimin normal të zgjedhjeve, sidomos në drejtim të saktësimit dhe plotësimit të regjistrave të gjendjes civile në bazë të të cilave do të hartohen listat e zgjedhësve.