KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

AKT TERRORIST NË LUSHNJË

NJË KËRCËNIM SERIOZ PËR ZHVILLIMIN E ZGJEDHJEVE

05.07.2001

Një akt terrorist serioz ndodhi në mëngjesit e 4 korrikut në qytetin e Lushnjës që pati në  shinjestër banesën e policit Idriz Shuli. Pas shpërthimit të një sasie tritoli të vendosur në ballkonin e banesës, banorët ndërsa përpiqeshin t'i shpëtonin atentatit u gjendën edhe përballë një shpërthimi tjetër, të një bombe të vendosur në të dalë të banesës së policit. Pati tri viktima, ndër të cilat një vajzë 12 vjeçare e cila ka marrë një plagë të rëndë dhe është shtruar në spital.

KSHH shpreh shqetësimin e madh për këtë incident, që ndodhi në mes të zhvillimit të fushatës elektorale dhe në prag të zgjedhjeve që do të mbahen në 8 korrik në Lushnjë. Ky është një akt që përkon me fushatën elektorale dhe mund të sjellë pasiguri e panik në ditët e fushatës dhe të zgjedhjeve të 8 korrikut.

KSHH nuk paragjykon askënd për kryerjen e këtij akti të rëndë terrorist. Ai u rekomandon subjekteve elektorale të mos bëjnë deklarata të nxituara me akuza, në adresë të kësaj ose asaj partie. Është detyrë e organeve kompetente të kryejnë hetimet dhe procedurat përkatëse dhe t'i vënë përpara përgjegjësisë autorët e kësaj vepre penale, të rrezikshme dhe të zbulojnë motivet e vërteta të saj.

Nga ana tjetër, KSHH vëren se subjektet e ndryshme elektorale gjatë fushatës zgjedhore i kanë ngritur tonet, dhe kjo e ka ndezur atmosferën, gjë që nuk i shërben zhvillimit normal  të zgjedhjeve të 8 korrikut.

KSHH u bën thirrje partive politike të bëjnë kujdes që debati midis tyre të mos kapërcejë kufijtë e një shkëmbimi idesh e alternativash. Duhet të tregohet po ajo vetëpërmbajtje dhe maturi si në raundin e parë të zgjedhjeve dhe kjo kërkon po atë ndjenjë të lartë përgjegjësie.

KSHH i kthehet edhe një herë seriozitetit të këtyre zgjedhjeve, të cilat duhet të ngjizin më tej imazhin e demokracisë shqiptare, në mënyrë që Shqipëria të bëjë një hap tjetër të madh përpara drejt standarteve evropiane.