KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

KSHH shpreh shqetësimin e tij që edhe pas raportit të OSBE/ODIHR-it, nuk po hidhen hapa konkrete në drejtim të përmirësimit të mëtejshëm të Kodit Zgjedhor

05.04.2004

Komiteti Shqiptar i Helsinkit, organizata e parë jo-fitimprurëse, e angazhuar në monitorimin e të gjitha zgjedhjeve që janë zhvilluar në vendin tonë, shpreh shqetësimin e tij që edhe pas raportit të OSBE/ODIHR-it, nuk po hidhen hapa konkrete në drejtim të përmirësimit të mëtejshëm të Kodit Zgjedhor dhe të krejt infrastrukturës zgjedhore.

KSHH, me keqardhje konstaton se pengesa kryesore, siç duket, është atmosfera e acaruar politike në vend, dukuri kjo që jo një herë është evidentuar edhe nga organizmat ndërkombëtare.

KSHH e shikon të nevojshme të theksojë se për realizimin e zgjedhjeve të lira, demokratike dhe të pakontestuara, janë të interesuar në radhë të parë vetë zgjedhësit. Në këtë vështrim, KSHH mendon se vonesat në përgatitjet e zgjedhjeve të ardhshme, mund të shoqërohen me pasoja të dëmshme dhe të pajustifikueshme. Është pikërisht kjo arsyeja që KSHH i sugjeron Kuvendit dhe Qeverisë së Republikës së Shqipërisë që me precedencë të marrin masat përkatëse tekniko-organizative dhe ligjore për të garantuar mbarëvajtjen e zgjedhjeve parlamentare në të gjitha aspektet e tyre.

KSHH i bën thirrje gjithashtu edhe të gjitha forcave politike të pozitës dhe opozitës që në interes të vendit dhe të së ardhmes së Shqipërisë, të bashkëpunojnë në përmirësimin e legjislacionit zgjedhor, hartimi dhe zbatimi i të cilit kërkojnë konsensus dhe vullnet politik në frymën e Kushtetutës dhe të parimeve bazë në të cilat mbështeten zgjedhjet e standarteve demokratike.