KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Trajnimi i anëtarëve të KZQV-ve është detyrim ligjor

Tiranë, më 25.08.2003

Komiteti Shqiptar i Helsinkit ndoqi me vëmëndje, deklaratën e datës 23 gusht 2003 të Z. Ilirjan Celibashi, kryetarit të KQZ-së, në të cilat nënvizon se në seminaret e organizuara për trajnimin e anëtarëve të KZQV-ve ka mungesa. KSHH-ja e konsideron të drejtë dhe shqetësues këtë deklarim.  Lidhur me këtë, vlen të përmendet se në raportin përfundimtar që KSHH-ja ka përgatitur për vëzhgimin e zgjedhjeve parlamentare të vitit 2001, veç të tjerave nënvizonte se një nga defektet e vërtetuara, ishte dhe ai i trajnimit të vonuar, jo të plotë dhe jo cilësor të anëtarëve të komisioneve të zgjedhjeve. E keqja është se kjo dukuri, megjithëse në një masë më të reduktuar, po përsëritet edhe në këto zgjedhje.

Siç dihet, dispozitat e Kodit Zgjedhor i ngarkon Komisionet e Zgjedhjeve për Qeverisjen Vendore (KZQV-të) me detyrimin për verifikimin e dokumentacionit të kandidatëve për regjistrim, shpalljen paraprake të listave të zgjedhësve, shqyrtimin e kërkesave për ndryshime në këto lista, etj.  Moszbatimi i detyrave të mësipërme mund të dëmtojë ecurinë normale të zgjedhjeve, si edhe të drejtat e shtetasve.  Anëtarët e KZQV-së që pa arsye, ose për arsye të ndryshme i shmangen trajnimit, nuk mund të kryejnë detyrat që u ngarkon ligji. 

Është kjo arsyeja që KSHH e shikon të nevojshme t’i sugjerojë Komisionit Qëndror i Zgjedhjeve (KQZ-së), që në mbështetje të nenit 42 të Kodit Zgjedhor, të mos hezitojë për të vendosur sipas rastit, shkarkimin e atyre anëtarëve të KZQV-ve që nuk përmbushin detyrat e caktuara, duke i zëvendësuar ata me anëtarë të tjerë.  Në sugjerimin e mësipërm, KSHH-ja ka parasysh faktet se KZQV-të krijohen sipas propozimeve të partive politike dhe se trajnimi i tyre është detyrim ligjor dhe përgjegjësi e KQZ-së.