KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

NUK U RESPEKTUA AFATI LIGJOR I SHPALLJES SË LISTAVE ZGJEDHORE 

Komiteti Shqiptar i Helsinkit (KSHH) çështjen e shpalljes së listave paraprake të zgjedhësve dhe ndryshimet në to i konsideron një nga aspektet më të rëndësishme të procesit zgjedhor. Në kuadër të misionit të vet, KSHH-ja ndërmori një vëzhgim të pjesshëm lidhur me shpalljen e listave të zgjedhësve.  Nga vëzhgimet e kryera në qytetet Tiranë, Korçë, Elbasan, Vlorë, Shkodër, Kukës dhe Fier rezultoi se:

1        Deri në datën 4 Prill 2005, përveç rrethit të Fierit dhe pjesërisht të Tiranës, listat paraprake të zgjedhësve nuk rezultojnë të jenë shpallur.

2        Në disa qendra votimi janë shpallur listat e zgjedhësve, por ato nuk janë vendosur në vende të dukshme dhe të mundshme për t’u kqyrur lirisht dhe në çdo kohë nga zgjedhësit.

Nga sa përmendëm më lart, KSHH–ja konstaton se në rastin konkret është shkelur pika 2 e nenit 64/2 të Kodit Zgjedhor ku thuhet se “Procesi i përgatitjes së listës së zgjedhësve për zgjedhjet për Kuvendin e Shqipërisë të vitit 2005 fillon jo më vonë se data 15 Mars 2005 …” ndërsa “lista paraprake shpallet jo më vonë se data 31 Mars 2005”.

Komiteti Shqiptar i Helsinkit mendon se vonesa e mësipërme dhe çdo vonesë tjetër në këtë drejtim mund të shoqërohet me pasoja të dëmshme për këto arsye:

1        Së pari, shpallja me vonesë e listave paraprake të zgjedhësve shkurton afatin e njohjes së zgjedhësve me këto lista.

2        Së dyti, veç kësaj, shkurtohet afati i përcaktuar në pikën 1 të nenit 56 të Kodit Zgjedhor ku thuhet se “Brenda 30 ditëve nga shpallja e listave paraprake të zgjedhësve, kryetari i njësisë së qeverisjes vendore kryen lajmërimin me shkrim për çdo zgjedhës …”. Kjo do të thotë se kryetarët e njësive të qeverisjes vendore pa shpalljen e listave paraprake nuk mund të fillojnë lajmërimin me shkrim të zgjedhësve, siç parashikon dispozita e mësipërme.

Në këto kushte, Komiteti Shqiptar i Helsinkit e shikon të nevojshme t’i bëjë thirrje të gjithë kryetarëve të njësive të qeverisjeve vendore që të marrin masa urgjente për shpalljen e listave paraprake të zgjedhësve dhe i sugjeron Ministrisë së Pushtetit Vendor dhe të Decentralizimit që të ushtrojë kontroll për të mos lejuar zvarritje në këtë proces.