KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Vonesë me pasoja

Për të dytën herë KQZ-ja ka tërhequr vëmendjen për mosparaqitjen në afatin e caktuar nga disa parti politike të kandidatëve për krijimin e komisioneve zgjedhore të qeverisjes vendore (KZQV-ve). Përsëritet e njëjta dukuri si në zgjedhjet e kaluara, megjithëse thuhet se tashti kemi një Kod të ri më të plotë dhe më të saktë.

Partitë politike janë të detyruara të zbatojnë ligjin vendimet dhe udhëzimet e KQZ-së që kanë fuqi juridike të përgjithshme në të gjithë territorin e Republikës së Shqipërisë. Me shqetësimin e mësipërm të KQZ-së bashkohet edhe Komiteti Shqiptar i Helsinkit sepse pasojat nga kjo vonesë mund të jenë të dëmshme. Ato mund të pengojnë realizimin në kohë të detyrave të KZQV-ve duke pasur parasysh faktin se shumica e anëtarëve të tyre mund të jenë të rinj, ndërsa procedura e zgjedhjes së tyre sipas Kodit të ri ndryshon nga procedura e mëparshme.

Në zgjedhjet e kaluara pikërisht për shkak të vonesave të tilla edhe trajnimi i anëtarëve të komisioneve zgjedhore ka qenë i vonuar dhe i shpejtuar gjë që ka reflektuar negativisht si në aspektet e ndryshme të zgjedhjeve, edhe ditën e votimit. Këto vonesa mund të sjellin gjithashtu vështirësi  dhe pengesa në ushtrimin e të drejtave që Kodi Zgjedhor u garanton zgjedhësve.

Komiteti Shqiptar i Helsinkit i angazhuar për shumë vjet në vëzhgimin e zgjedhjeve të përgjithshme dhe lokale i sugjeron partive politike përkatëse që të zbatojnë afatet ligjore si dhe udhëzimet e KQZ-së.