Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

Largimi i kundraligjshëm nga puna dhe mosekzekutimi i vendimeve të Komisionit të Shërbimit Civil për rikthim në detyrë, cënojnë të drejtat e njeriut

09.01.2006

Në Komitetin Shqiptar të Helsinkit, këto dy muajt e fundit, janë ankuar disa persona me pretendimin se i kishin larguar padrejtësisht nga puna. Ata pretendonin gjithashtu se lidhur me masën disiplinore që ishte marrë ndaj tyre, nuk u ishte dhënë mundësia të jepnin sqarime dhe të mbroheshin.

KSHH u sugjeroi personave të mësipërm që brenda afatit ligjor të ankoheshin në organet përkatëse. Megjithatë, KSHH, pavarësisht nga fakti nëse ankesat e tyre ishin ose jo të bazuara, e vlerësoi këtë çështje si një problem që kishte të bënte me respektimin e të drejtave të njeriut. Pikërisht, për këtë arsye dhe për një informacion më të saktë dhe më të plotë ai iu drejtua Komisionit të Shërbimit Civil që, siç dihet, është institucion i pavarur i emëruar nga Kuvendi i Shqipërisë dhe i ngarkuar posaçërisht me zgjidhjen e ankesave të nëpunësve të shërbimit civil.

Përfaqësuesit e KSHH-së u njohën me ankesat e paraqitura në këtë Komision dhe rezultoi se gjatë muajit dhjetor, nga 34 vendime të dhëna nga Komisioni i Shërbimit Civil, 30 prej tyre i përkisnin sektorit të doganave, prej të cilëve 19 persona janë larguar me motivacionin për pjesëmarrje në veprimtari politike, pa paraqitur para Komisionit asnjë provë që të vërtetonte se kjo pjesëmarrje binte ndesh me ligjin apo me ndonjë akt nënligjor, ndërsa 4 të tjerë ishin larguar me motivacionin se në zgjedhjet e 3 korrikut të vitit të kaluar, kishin qenë anëtarë në komisionet e qendrave të votimit.

Komisioni i shërbimit Civi, duke mos i gjetur të bazuara largimet nga detyra të rasteve të mësipërme, ka vendosur rikthimin e tyre në punë.

Përfaqësuesit e KSHH-së u vunë në dijeni gjithashtu se administrata publike kishte refuzuar zbatimin e shumë prej vendimeve të Komisionit të Shërbimit Civil për rikthimin e tyre në punë.

Edhe pse KSHH nuk paragjykon vendimet e mundshme që mund të jepeshin lidhur me këto çështje nga ana e gjykatës, e shikon të nevojshme të evidentojë faktin se refuzimi i ekzekutimit të vendimeve të Komisionit të Shërbimit Civil për rikthimin në punë, përbën shkelje të ligjit.

E themi këtë sepse në nenin 8 pika 3 e ligjit Nr. 8549, dt. 11.11.1999 “Status i nëpunësit civil”, thuhet shprehimisht se “Vendimet e Komisionit të Shërbimit Civil….janë të detyrueshme për institucionet e administratës publike vendore dhe qëndrore”.

Për KSHH-në tërheq gjithashtu vëmendje numri relativisht i madh i vendimeve të Komisionit të Shërbimit Civil për rikthimin në detyrën e mëparshme, në raport me çështjet e shqyrtuara dhe të përfunduara.

KSHH, në përfundim, e shikon të nevojshme të theksojë se në rastet e marrjes së masave disiplinore që përmendëm më lart, nuk është mbajtur si duhet parasysh parimi i sanksionuar në nenin 3 të ligjit “Statusi i nëpunësit civil” ku thuhet se: “Shërbimi civil është ndërtuar dhe vepron mbi bazën e profesionalizmit, të pavarësisë dhe integritetit, të paanësisë politike, të transparencës, të shërbimit ndaj publikut, të vazhdimësisë të karrierës, të përgjegjësisë dhe korrektësisë në zbatimin e legjislacionit në fuqi”, si edhe neni 25 pika 2 e ligjit “Statusi i nëpunësit civil” që në këto raste kërkon nga administrate publike që t’i garantojë nëpunësit civil ndaj të cilit është menduar të merret masa disiplinore, të drejtën për t’u informuar, për t’u dëgjuar, për t’u mbrojtur dhe për t’u ankuar.

Moszbatimi me rigorozitet i dispozitave të mësipërme ligjore, cënon të drejtat e shtetasve gjë që shoqërohet edhe me pasoja të dëmshme.